АНАЛИЗА НА МЕРИЛАТА ЗА КВАЛИТАТИВНА И КВАНТИТАТИВНА ПРОЦЕНА НА СУРОВИОТ ТУТУН ВО ЛИСТ ВО Р. МАКЕДОНИЈА

Процената на тутунот при откупот во последниве години во практиката не соодветствуваше со мерилата пропишани во постојниот Правилник. Тоа е резултат на високиот квалитет на тутунот што го даваат одгледуваните типови и сорти и примената на современите агротехнички мерки во производството. Постојат инсерции кои според квалитетот на употребната вредност во индустриската класификација можат да се рангираат во повисоките класи. Во Правилникот за мерилата за квалитативна и квантитативна процена на суровиот тутун во лист за ориенталските типови на тутун прилеп, јака, џебел и басмак (“Службен весник на РМ” 16/2007 и 144/2010) се наведени 6 откупни класи за ароматичните тутуни (I, II, III-А, III-Б, IV и V) и 5 класи за дополнителните тутуни (I, II, III, IV и V). По извршената анализа, предложено е намалување на класите на ориенталскиот ароматичен тутун на 4 класи и тоа: I, II, III и IV класа, и за дополнителните тутуни на две класи: I и II класа, со што ќе се овозможи пореална процена и вреднување на квалитетот на тутунот и трудот на тутунопроизводителите.

Клучни зборови: квалитет на тутун, типови на тутун, прилеп, јака, басмак, џебел