ПОВАЖНИ ОБЕЛЕЖЈА НА ТУТУНОПРОИЗВОДСТВОТО ВО РЕПУБЛИКА МАКЕДОНИЈА

Врз основа на статистички податоци за периодот 2001-2010 година, авторите утврдиле дека тутунот во Република Македонија се одгледува на површина од 18,500 ха, што е 3% од обработлива површина или 75% од индустриските култури. Просечните приноси на сув тутун, по години од истражуваниот период, се движат помеѓу 1,000 и 1,500 kg/ha. Тоа овозможува на пазарот на ориенталски тутуни да се стават на располагање помеѓу 17 и 30 илјади тони македонски тутун. Од тоа, речиси 92% се извезува, а остатокот се користи во земјата. Но, Македонија и увезува тутун, главно крупнолисни тутуни. Анализата на цените (откупни, извозни и увозни) покажала дека најголема стабилност има кајцената при извозот на тутун и преработки од тутун. Имено, таа расте од година во година со ист интензитет, при што, речиси, го следи порастот на курсот на американскиот долар. Наспроти тоа, пак, најголема флуктуација имаат цените при откупот на тутунот.