Во фитопатолошката лабораторија како и во in vitro лабораторијата при Научниот институт за тутун од Прилеп, вршени се испитувања за присуството на токсични материи во инокулумот од патогенот Phytophthora parasitica var. nicotianae како и на нивното влијание врз тутунското растение, oдносно дали овие токсични метаболити причинуваат одредени некротични реакции или други оштетувања кајрастението-домаќин. Направена е споредба на симптомите коишто се појавија како резултат на влијанието на токсичните метаболити и симптомите причинети од самиот патоген. Како инокулум беа користени суспензија пoдготвена од мицелија на габата и филтрат како селективен агенс добиен од габата одгледувана на течна хранлива подлога, којпотоа е филтриран низ филтер-хартија и бактериолошки филтер со порозност од 0,22 микрона. За испитување беа користени листови од видот N. nesophila и листови од две ориенталски и една берлејска сорта од N. tabacum. Инокулирањето е извршено  со поставување на капка од инокулумот на површината од листот и со потопување на основата од листот во користениот инокулум. Кајинокулираните листови по двете методи (со капка и со потопување) и со двата инокулума, можеше да се забележи разлика во развојот на некрозата која се појавуваше по површината на листовите. Некрозата се ширеше многу побрзо кајлистовите кои беа инокулирани со суспензија подготвена од мицелија на патогенот, каде и процентот на оштетено лисно ткиво беше повисок, а побавно кајлистовите инокулирани со селективниот агенс. Симптомите појавени по површината на листовите причинети од токсичните метаболити на патогенот не се разликуваа од оние кои беа причинети од самиот патоген. Целта во ова истражување беше да се провери инфективноста на токсичните материи што ги ослободува патогенот и разликата во оштетената лисна површина причинета од двата користени инокулума.