Целта на овие истражувања е да се проучи и прикаже начинот на пренесување на својството отпорност кон обичниот мозаик вирус (TMV) кајнекои комерцијализирани ориенталски сорти тутун по методот на повратно вкрстување. Како почетен материјал при вкрстувањето се користени странски ориенталски сорти отпорни на вирусот (АА) и неотпорни сорти-примачи на својството отпорност (аа), кои во однос на другите квалитетни и производни својства се добри за откупувачите. Во F1 е добиено отпорно хетерозиготно потомство (Аа), кое повратно се наситува со полен од сортата примач (аа). Во првата повратна генерација (BC1), како и во останатите генерации до BC4 и, BC5, земани се отпорни растенија кои по својот фенотип се поблиску до сортата-примач и повторно беа наситувани со полен од сортата-примач на ова својство. За инокулација на растенијата од одделните хибридни генерации се користеше инфективен сок од мозаични тутунски растенија, а заразувањето е извршено по методот на Терновский.

Клучни зборови: тутун, ориенталски сорти, пренесување на отпорност на TMV, повратно вкрстување